ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានជូនពរពលរដ្ឋខ្មែរកាត់ចិនទាំងអស់ និងជនរួមជាតិដែលចូលរួមអបអរសាទរពិធីបុណ្យចូលឆ្នាំប្រពៃណីចិន ប្រកបតែសេចក្តីសុខ សុភមង្គល ព្រមទាំងមានលាភសំណាងលុយកាក់ហូរចូលគ្រប់ៗក្រុមគ្រួសារកុំបីខាន ទន្ទឹមនឹងនោះ។

ទន្ទឹមនឹងនេះដែរសម្ដេច អំពាវនាវឱ្យមានការប្រុងប្រយ័ត្នខ្ពស់ចំពោះការចម្អិនម្ហូបអាហារ ដុតក្រដាស់សែន ធូប និងទៀន ដើម្បីចៀសវាងកុំឲ្យមានអគ្គីភ័យកើតឡើងដែលធ្វើឲ្យរំខានក្នុងថ្ងៃចូលឆ្នាំនេះ។

សម្ដេចតេជោ ក៏បានអំពាវនាវដល់ពលរដ្ឋឱ្យគោរពច្បាប់ចរាចរណ៍ កុំផឹកស្រវឹងហើយបើកបរ ត្រូវមានការយោគយល់អាធ្យាស្រ័យ និងប្រុងប្រយ័ត្នជានិច្ច។

សម្ដេចបានសរសេរក្នុងហ្វេសបុកផេករបស់សម្ដេចថា៖ «ក្នុងឱកាសបុណ្យចូលឆ្នាំចិននេះដែរ ក៏មានបងប្អូនមួយចំនួនធ្វើដំណើរទៅកាន់បណ្តាខេត្តផ្សេងៗ។ សូមបើកបរគោរពច្បាប់ចរាចរណ៍ កុំផឹកស្រវឹងក្នុងពេលបើកបរ ត្រូវមានការយោគយល់គ្នា និងប្រុងប្រយ័ត្នខ្ពស់ជានិច្ច ទោះបីបើកបរជិតឬឆ្ងាយ ដើម្បីសុវត្ថិភាពក្នុងថ្ងៃចូលឆ្នាំទាំងអស់គ្នា។ ខ្ញុំ និងភរិយា សូមជូនពរបងប្អូនជនរួមជាតិជួបតែសំណាងល្អ ជោគជ័យ និងហេងហេងគ្រប់ៗគ្នាចាប់ពីឆ្នាំថ្មី ២០២២ នេះតទៅ»។

ពិធីបុណ្យចូលឆ្នាំចិនប្រព្រឹត្តិចាប់ពីថ្ងៃទី៣១ ខែមករា រហូតថ្ងៃទី២ ខែកុម្ភៈ ឆ្នាំ២០២២៕